Doktoro Kiu?
Artikolo omaĝe al la 1a Doktoro okaze de la kristnaska epizodo
Mi ne estas “nur” doktoro. Mi estas La Doktoro… La originala, verdire…
Ĉiuj spektantoj de la brita TV-serio Doktoro Kiu nun jam alkutimiĝis al la afero: nun ĉiujare ekde 2005 aperas speciala epizodo okaze de Kristnasko. Ĉi-jare, en 2017, la evento estas iom pli atendata, ĉar Peter CAPALDİ transdonos la ĉefrolon al la 13a enkorpiĝo Jodie WHİTTAKER fine de rakonto dum kiu la 12a Doktoro renkontos sian unuan enkorpiĝon!
Jen okazo proponi al vi kvin spektindajn rakontojn de la 1a Doktoro, ordigitajn de ĝuebla ĝis la plej ĝuebla :
5. La Romianoj (The Romans)
Kiam la serio Doktoro Kiu komenciĝis en 1963, la ideo por la brita televido-elsendanto BBC estis havi programon, kiu celas infanojn kaj instruas ilin pri historio kaj sciencoj. Ekde la dua sezono, la produkto-teamo provis aldoni iom da humuro al la epizodoj, kaj La Romianoj estas laŭ-memore la unuan tian epizodon. En ĝi, la Doktoro kaj la TARDIS-kunvojaĝantoj alvenas en la antikvan periodon de Romo dum la regado de Nerono, tuj antaŭ la Granda İncendio de Romo. Ĝi estas ĝuinda historia rakonto de la unuaj jaroj.
4. La Tempo-entrudiĝanto (The Time Meddler)
Multan tempon antaŭ la unuaj mencioj de Galifrejo, la devena planedo de la Doktoro, de la Majstro kaj de la Tempo-lordoj, la Doktoro renkontas en La Tempo-entrudiĝanto alian TARDIS-vojaĝanton, kiu nomiĝas “La Monaĥo” kaj atendas la Vikingojn en 1066. La rakonto estas fama pro tio, ke ĝi estas la unua kiu enmiksas historiajn kaj sciencfikciajn aspektojn, krom la enkonduko de samplaneda malamiko de la Doktoro — kaj li revenos post kelkaj epizodoj en La Majstro-planon de la Dalekoj.
3. La Dalekoj (The Daleks)
Ekde la unua jaro 1963, la TV-verkisto Terry NATİON proponis rakonton ene de kiu la Doktoro kaj kunvojaĝantoj renkontas robotajn malamikojn sur la planedo Skaro, sendube la plej konataj malamikoj de la serio.
La rakonto estas la dua de la 1a sezono, kaj enkondukas multe da elementoj de la Daleka historio ankoraŭ nuntempe uzataj, ekzemple la Dalekan urbon komence de la 9a sezono kun Peter CAPALDİ en 2015.
2. Aventuro tra spaco kaj tempo (An Adventure in Space and Time)
Nu, tiu rakonto ne vere estas epizodo de la serio Doktoro Kiu, ĉar ĝi estis registrita okaze de la 50a datreveno de la serio kiel omaĝo-filmo al la unua ĉefaktoro William HARTNELL. Kadre de ĝi la aktoro David BRADLEY havas la honoron roli kiel la 1a Doktoro: la filmo rakontas la jarojn 1963–1966, dum kiuj la BBC decidis krei la serion, serĉi aktorojn, verki la unuajn epizodojn kaj reklami pri ĉio.
Dum la rakonto ni povas spekti la plej epoko-farajn scenojn el la cento da epizodoj kun la 1a Doktoro, kaj ni ricevas multe da informoj pri la produktado de la serio, de la muziko al eltroviĝo de la Dalekoj aŭ la malsaniĝo de William HARTNELL, ĝis la ideo regeneri la Doktoron per la aktoro Patrick TROUGHTON. Plej notinde estas, ke David BRADLEY estos en la ĉi-jara Kristnaska epizodo.
1. La Deka Planedo (The Tenth Planet)
Tiu ĉi rakonto estas la kronologia sekvo de tio, kio okazis kun Peter CAPALDİ dum la du lastaj epizodoj de la 10a sezono elsendata ĉi-jare. Ni ja ĵus spektis la kreadon de la Kiberhomoj el Mondas, kaj jen en La Deka Planedo la renkontiĝo de la 1a Doktoro kun ili… kaj lia lasta rakonto antaŭ la regenerado al la 2a Doktoro. Sendube la ĉi-jara Kristnaska epizodo okazos dum tiu periodo, se kredi la antaŭ-filmon.
La elsendo de la Kristnaska epizodo La Doktoroj okazos post kvin monatoj: ĝis tiam, bonan spektadon de la “klasikaj epizodoj”!
